زارا محەممەدی بۆ وەرگرتنی حوکمەکەی چووە بەردەم دادگای سنە و خۆی رادەست کرد

08/01/2022

ئەمڕۆ شەممە ٨/١/٢٠٢٢ زارا محەممەدی بۆ وەرگرتنی ئەو حوکمەی کە بەسەریدا سەپاوە چووە بەردەم دادگای سنە و خۆی رادەستی دادگا کرد.
زارا محەممەدی مامۆستای زمانی کوردی و ئەندامی ئەنجومەنی فەرهەنگی کۆمەڵایەتیی ڤەژین کە بە تاوانی کورد بوون و وتنەوەی وانەی کوردی حوکمی پێنج ساڵ بەندکردنی بەسەردا سەپابوو، دوای گرتنەبەری گشت رێکارە یاساییەکان و تانەدان لەو حوکمە و رەتکردنەوەی داواکەی لە لایەن بەرپرسی گشتیی دادگوستەریی پارێزگای سنە و ناردنی حوکمەکەی بۆ بەشی جێبەجێکردنی حوکمەکان، سەرەنجام ئەمڕۆ خۆی رادەستی دادگای ئەو شارە.
کۆمەڵێک لە چالاکوانانی کورد و بنەماڵە و هاوڕێیانی زارا بۆ ماڵاوایی کردن لێی لەبەردەم دادگا کۆببوونەوە.
زارا لە بەشێک لە قسەکانی‌دا وتی : "بەقەد هەموو ئەو چرکانەی کە لە بەندیخانە دەبم قوڕ بەسەر ئەو دوژمنەی هیوای بە بەندیخانەیە..."
دوژمنان و داگیرکەرانی کوردستان بۆ سڕینەوەی کورد و کوردستان و زمانی کوردی ئەوەی لەتوانایان بێ خستوویانەتەگەڕ و ئەوەی پێیان کرابێ بەرانبەر بە رۆڵەکانی ئەم نیشتمانە کردوویانە و دەیکەن.
تاکە چارەسەر و رێگای رزگاریی ئەم نەتەوەیە دەرچوون لەژێردەستەیی و دامەزراندنی دەوڵەتی سەربەخۆی کوردستانە بۆ ئەوەی کە زارا و هەزارانی وەک زارا بتوانن لە کوردستانێکی ئازاد و سەربەخۆدا خزمەتی زمانی کوردی بکەن و نەوەی داهاتوو بە زمانی نەتەوەییان پەروەردە بکەن.