پەیامی رێکخراوی لاوانی ئازادیی کوردستان بەبۆنەی رۆژی جیهانیی لاوان

پێش 3 هەفتە

پەیامی رێکخراوی لاوانی ئازادیی کوردستان بەبۆنەی رۆژی جیهانیی لاوان

لاوانی تێکۆشەری کوردستانی!
کچان و کوڕانی ئازای کوردستان!
ئەمڕۆ ١٢ی ئاگۆست، ٢٦ ساڵ بەسەر بڕیاری نەتەوە یەکگرتووەکان بۆ دیارییکردن و تەرخانکردنی رۆژێک بۆ لاوان و وەبیرهێنانەوەی پێگە و رۆڵ و تواناییەکانی لاوان بۆ سازدانی جیهانێکی باشتر تێدەپەڕێ. بێگومان لاوان، جیلی بە وزە و شوێندانەری کۆمەڵگەکانن و دەتوانن رۆڵ و کاریگەرییان لە بوارە جۆراو جۆرەکاندا هەبێت.
لەگەڵ ئەوەی پرسی ماف و ئازادییەکانی لاوان پرسێکی جیهانییە، هاوکات بە گوێرەی سیستەم و بنیاتی دەوڵەتەکان پرسی لاوان و مافەکانیان جیاوازن و لە هەر وڵاتێک‌دا ئەم پرسە تایبەتمەندیی خۆی.
پرسی ماف و ئازادییەکانی لاوان لە کوردستان بەشێکی پەیوەست و جیانەکراوەیە لە پرسی نەتەوەی کورد وەک نەتەوە و نیشتمانێکی داگیرکراو. لاوانی کوردستان وێڕای ئەوەی لەژێر گوشار و سیاسەتە نامرۆڤانەکانی دەوڵەتی داگیرکەری ئێرانی‌دا بەردەوام لەبەر پیلانی سیستماتیکدا بوون و ئەو دەوڵەتە لە خولقاندنی هیچ تاوانێک بەرانبەریان خۆی نەبواردووە، و بە گرتن، لێدان، کوشتن، ئێعدام  بێ‌کاری و برسیی‌کردن و ناچارکردنیان بە کۆڵبەریی و بڵاوکردنەوەی مادەی هۆشبەر نەوەستاوە و دایانیماڵیوە لە هەموو ماف و ئازادییەکانیان. لەگەڵ هەموو ئەمانەشدا لاوانی کوردستان، نەک هەر ملیان بە داگیرکەر نەداوە و لە خەبات و هەوڵەکانیان بۆ چەسپاندنی ماف و ئازادییەکانیان نەوەستاون، بەڵکوو داینەمۆ و پێشەنگی گۆڕانکارییەکان و ئاڵاهەڵگر و بزوێنەری راپەڕین و بزووتنەوەی رزگارییخوازیی کورد و کوردستانن.
لەگەڵ هەموو ئەو بەربەست و رێگرییانەی خراوەنەتە بەردەم ماف و ئازادییەکانی  لاوان و ئەو پیلانگێڕییانەی لەدژی نەتەوەی کورد بەڕێوەدەچێ؛ لاوانی کوردستان لە ریزی پێشەوەی بەرەنگاربوونەوەی داگیرکەرانن و لەپێناو دەستەبەرکردنی ماف و ئازادییەکانیان لە کوردستانێکی ئازاد و سەربەخۆدا لە هەوڵ و تێکۆشاندان.
لەم ساڵانەی کۆتایی‌دا و بەتایبەت لەگەڵ دەسپێکی راپەڕینی ژینا و  دواتر رێوڕەسمەکانی نەورۆز و پاراستنی ژینگە و خاوەندارێتییکردن لە شەهیدانی کوردستان، بەرزیی ئاستی وشیاریی نەتەوەیی لاوان و رۆڵ و کاریگەرییەکانیان بە هەڵوێست و دروشمە بوێرانەکنیان زیاتر بەرچاوکەوت.
رێکخراوی لاوانی ئازادیی کوردستان لەم رۆژەدا پیرۆزبایی دەکات لە لاوانی کوردستان بە گشتیی و رۆژهەڵاتی نیشتمان بە تایبەتیی؛ دڵنیایە لاوان هیوای ئێستا و دواڕۆژی ئەم نەتەوەیەن و گۆڕانکارییە گەورە و چارەنووسسازەکان و ئامانجەکانی نەتەوەکەمان لەسەر دەستی کچان و کوڕانی لاوی کوردستان وەدی‌دێن.
رێکخراوی لاوانی ئازادیی کوردستان RAK
١٢ی ئاگۆستی ٢٠٢٥