کوردستان خوێنی رۆڵەکانی ون ناکا

پێش 3 هەفتە

کوردستان خوێنی رۆڵەکانی ون ناکا

ئەمڕۆ هەینی ٢٤ی گەلاوێژی ٢٧٢٥، ژمارەیەکی زۆر لە کچان و کوڕانی کوردستانی، چالاکانی مەدەنی، ژینگەپارێزان و شاخەوانان بە رێپێوان بەرەو شوێنی گیانبەختکردنی سێ شەهیدی نوێی پاراستنی سروشت و ژینگەی کوردستان لە کێوی ئاویەر رۆشتن و پەیمانیان لەگەڵ نوێ کردنەوە.
رۆڵەکانی کوردستان بۆ بەرزڕاگرتنی ناو و یادی قارەمانانی گیانبەختکردووی پاراستنی کوردستان و خاوەندارێتیکردن لێیان، بە وتنەوەی دروشمگەلی " شەهید نامرێ" و " حەمید، چیاکۆ، خەبات قارەمانە، شەهیدی کوردستانە" و وتنەوەی سروودی " ئەی شەهیدان" و سروودی دیکەی نەتەوەیی و نیشتمانی، یادی شەهیدانیان کردەوە.
گڕتێبەردان و تێکدان و تاڵانکردنی سروشتی کوردستان بە رێگای جۆراوجۆر، بەشێکن لەپیلانگێرییە سیستماتیکەکانی دەوڵەتی داگیرکەری ئێرانی و بە قاقڕکردنی سروشتی کوردستان هەر نەبڕاوەتەوە و درێژەی هەیە و ئێستاش هاوکات لەگەڵ دەرچوونی ئەم راگەیەندراوە دارستانەکانی ئاوایی بەیێڵە و قەڵای مەریوانیش گڕیان تێ بەردراوە .بۆیە ئەرکی کورد بۆ بەگژداچوونەوەی ئێران کۆتایی نەهاتووە.
پارتی ئازادیی کوردستان وێڕای پشتیوانیی لە کوردستانییان بۆ خاوەندرێتیی لە خوێنی شەهیدانی پاراستنی کوردستان و بەجێگەیاندنی ئەرکی ئەوڕۆیان بۆ بەرز و زیندوو راگرتنی ناو و یادی شەهیدان؛ هاوکات پێ لەسەر ئەوە دادەگرێتەوە کە ژینگە و سروشتی کوردستان و پاراستنی دابڕاو نیین لە ناسنامەی نەتەوەییمان و بەشێکن لە تێکۆشانی کوردستان بۆ بەرەنگاربوونەوەی داگیرکەران.
کوردستان خوێنی رۆڵەکانی ون ناکا و خوێنگری شەهیدانیەتی.

خەلیل نادری
وتەبێژی پارتی ئازادیی کوردستان PAK
٢٤ی گەلاوێژی ٢٧٢٥ ک
١٥ی ئاگۆستی ٢٠٢٥ی ز